Nenezićev komad “Ekselencije” – priča o izgubljenim identitetima, u sali Dodest

Nakon nekoliko uspješnih gostovanja, predstava “Ekselencije” nastala u produkciji Kulturno -informativnog centra “Budo Tomović” biće izvedena na DODEST-ovoj sceni sjutra od 20 sati.

U predstavi čiji tekst i u režiju potpisuje pisac i dramaturg Obrad Nenezić igraju Žaklina Oštir i Jovan Dabović. Scenografiju je radio Darko Musić, kostime Vera Šoškić, ton Vladan Pićurić, a svijetlo Dražen Milić.

Duhovita drama “Ekselencije” je priča o izgubljenim identitetima. Međutim, u ovoj duhovitoj drami niko ne tjera junake da izgube svoj identitet, osim njihovih nesuvislih ambicija i apetita za uspjehom, koji im se čini nadohvat ruke… Ali ne znaju da je svaki uspjeh veoma dalek svakom iole normalnom čovjeku (jer normalan čovjek svoju životnu trku počinje od nule… sa starta – a onaj drugi sa cilja, i trči svoj život unazad). I taj ga uspjeh čini još običnijim i normalnijim, za razliku od onog koji uspjeh kupuje i ostvaruje preko noći. Takođe, “Ekselencije” su priča o potrazi za tim izgubljenim identitetom. Ali, kad neplivač skoči u more za bisernom školjkom, ili u rijeku za grumenom zlata, to blago ga neće naučiti da pliva i da spasi svoju ludu glavu. Upravo u tom vakuumu, toj borbi za goli život, nalazi se duhovitost ovog komada, koji nije pristojno nazvati komedijom, jer se, između ostalog, dominantno bavi i bijelom kugom.