Video
Nova teatarska produkcija Kulturno – informativnog centra “Budo Tomović'”, predstava “Ekselencije”, biće odigrana sjutra veče u 19 sati u sali KIC-a “Zeta” u Golubovcima.
Komad po tekstu i u režiji Obrada Nenezića izazvao je odlične reakcije publike nakon premijere i repriznog izvođenja krajem januara, a potom i u okviru manifestacije MAKADO, gdje je ova predstava zvanično otvorila ovogodišnju sedmu manifestaciju kamernih dramskih ostvarenja.
Duhovita duodrama u kojoj glavne uloge tumače Žaklina Oštir (nagrada za najbolju glumicu VII MAKADO-a) i Jovan Dabović, donosi priču o izgubljenim identitetima i potragom za njima, gdje niko ne tjera junake da izgube svoj identitet, osim njihovih nesuvislih ambicija i apetita za uspjehom, koji im se čini na dohvat ruke… Ali, kad neplivač skoči u more za bisernom školjkom, ili u rijeku za grumenom zlata, to blago ga neće naučiti da pliva i da spasi svoju ludu glavu. Upravo u tom vakuumu, toj borbi za goli život, nalazi se duhovitost ovog komada, koji nije pristojno nazvati komedijom, jer se, između ostalog, dominantno bavi i bijelom kugom. M.R.
Preporučeno
