Video
Boan, mjesto udaljeno desetak kilometara od Šavnika i 20-tak od Žabljaka, put vas može nanijeti samo u izuzetnim prilikama. Ako niste avanturista, ili učitelj u školi koju pohađa tek 20 tak đaka, onda vas tu može dovesti još jedino legenda o tunelu Semolj. Zaputila se i ekipa TVCG jer legenda o tunelu, pola vijeka od početka njegove gradnje, opet živi. Na samom ulazu zaustavlja ih Đoko Bijelić sa kojim dijele prve utiske o ideji predsjednika nekoliko okolnih opština da se prema Vladi urgira proboj tunela Semolj.
“Oživjelo bi ovo, kako ne bi, išao bi put, ne bi išli gore preko prevoja Semol, mogli bismo doći put svijeta, ovako ne možeš nikud”, kazao je stanovnik Boana Đoko Bijelić.
Desetak kilometra naprijed, stiže se do prevoja Semolj koji je najkraća veza sa Kolašinom, ali dobrim dijelom godine neprohodan zbog snjegova. Zato je za mještane tog kraja tunel Semolj bio i ostao nedosanjani san.
“To je od opšteg značaja za život ljudi na ovim prostorima jer se ovdje narod isključivo bavi poljoprivredom i stočarstvom pa je važno zbog plasmana svojih tržišnih viškova, proizvioda: sira, skorupa, mesa. Onda, Titograd nam je na vratima i autoput je na vratima”, kazao je stanovnik Boana Milivoje Ašanin.
Inicijativa je upućena Vladi, odgovor se čeka, jer tunel je projekat koji za ovaj kraj znači sve.
“Konkretno donosi život. Život, investicije, opstanak ljudi ovdje, da žive i stvaraju na svojim ognjištima”, kazao je predsjednik opštine Šavnik Jugoslav Jakić.
“Trenutno nemamo nijedan autobus koji dolazi na Boan ni iz jednog kraja Crne Gore”, kazao je stanovnik Boana Srđan Gašević.
“Hotel u Boanu bio bi otvoren i on bi bio bogom dan za privlačenje turista”, kazao je stanovnik Boana Milivoje Ašanin.
I baš usred izlaganja o turističkoj viziji tog kraja kao znak sa neba priču je prekinuo zvuk motora.
Bila je to prilika da se ekipa TVCG uvjeri zašto ljudi izbjegavaju desetak kilometara trase preko Semolja čak i u godini bez snijega, pa su se uskim, ali očuvanim putem koji je gradila JNA, polako spustili do ulaza u tunel sa moračke strane.
Preporučeno
Skoro trećina tunela je već probijena, zašto onda i ne nastaviti pitaju se mještani jer je, zaključuju, i struka prije dvadesetak godina, za to dala zeleno svjetlo.
