“Rupe u glavi” Vanje Bulića večeras u Akademiji znanja u Budvi

Knjiga satiričnih priča “Rupe u glavi” autora Vanje Bulića, za koju je dobio nagradu “Radoje Domanović” biće predstavljena večeras od 20 časova u holu Akademije znanja u Budvi.

O romanu će govoriti književni kritičar Karlo Astrahan i autor.

Autor, Vanja Bulić, u predgovoru “Kako nastaju rupe u glavi”, između ostalog, bilježi sljedeće:

“Pisanje satiričnih priča danas slično je pisanju satiričnih priča osamdesetih godina, nakon Titove smrti, mada je teško naći dodirne tačke između ta dva perioda. Jedina sličnost je u tome što smo i tada, a i sada, neprestano u nekim reformama i ozbiljnim zaduživanjima kod stranih investitora, koji nas vode u nikad bolji život. I tada, prije četrdeset godina, a i danas, kada napišem istinit tekst, on zvuči kao satira. Šta je uzrok ovoj čudnoj društvenoj pojavi?”

Satiričar Aleksandar Čotrić u pogovoru bilježi: “Kada Vanja Bulić u svojim pričama dodirne ranjiva mjesta u društvu i ukaže na nedostatke, čitaocu izmami osmijeh na licu koristeći riječi koje ga oraspolože, a kad se nasmije svom bolu i tretira svoj život sa smiješkom, onda se njegov bol smanjuje i on pronalazi rješenje. Za ovo štivo, simbolično i adekvatno nazvano ‘Rupe u glavi’, s punim pravom možemo reći da je ljekovito, jer je smijeh blagotvoran, a kao što znamo – ljekovi jesu gorki, ali ih koristimo da se bolje osjećamo i izliječimo”. M.R.