SAD su u petak optužile devetoro Iranaca i jedno iransko preduzeće za pokušaj hakovanja stotina američkih i međunarodnih univerziteta, desetak preduzeća i djelova američke vlade za iransku vladu.

Kibernetičkim napadom ukradeno je više od 31 terabajta akademskih podataka i intelektualnog vlasništva sa 144 univerziteta u SAD i 176 univerziteta u 21 drugoj zemlji, objavilo je Ministarstvo pravosuđa.

Ministarstvo finansija objavilo je da uvodi sankcije protiv optuženih i iranskog instituta Mabna, koji je, prema američkim vlastima, pomagao Irancima u napadu.

“Ti optuženici sada su bjegunci pred pravdom”, rekao je zamjenik američkog javnog tužioca Rod Rosenstejn, upozorivši da im prijeti izručenje u više od 100 država ako napuste Iran.

Ovo je četvrti put u posljednjih nekoliko mjeseci da je američka administracija okrivila neku stranu vladu za velike kibernetičke napade, što je Obamina administracija rijetko činila.

Napad je obuhvatio elektronsku poštu više od 100.000 profesora u svijetu i kompromitovao njih oko 8.000, navodi ministarstvo, ističući da je riječ o jednom od najvećih napada do sada koji su istražili. Meta napada bio je i UN.

Prošle sedmice američka vlada optužila je rusku vladu za kibernetičke napade počinjene unazad najmanje dvije godine, a čija je meta bila američka elektroenergetska mreža.

Vašington je uveo sankcije za 19 Rusa i pet organizacija, uključujući tajne službe, zbog miješanja u američke predsjedničke izbore 2016. i druge kibernetičke napade.

Obamina administracija optužila je 2016. sedmoro Iranaca za kibernetičke napade na desetak američkih banaka i pokušaj gašenja brane u Njujorku. Bili su takođe optuženi da su radili za iransku vladu, prenosi Index.hr.