Poslije ubjedljivog poraza prije tri dana na parketu Njemačke, mnogo bolje su izabranici Boška Radovića odigrali pred punom “Moračom”.

Osim u prvoj četvrtini, selekcija iz Skandinavije nije bila ravnopravan rival našim momcima koji su imali mnogo bolji pristup u ovom susretu, nego na startu ciklusa.

Tokom drugog perioda Crna Gora je došla do dvocifrene prednosti, koju je nadogradila u nastavku.

Sjajan je u trećem periodu bio Kendrik Peri, kada je naša prednost prešla i 20 poena i sve je bilo gotovo, pa je posljednja četvrtina bila odrađivanje posla.

U našem timu 18 poena i pet asistencija Kendrika Perija, Marko Simonović dodao je 16 koševa i osam skokova, a imao je i četiri dodavanja, dok su dvocifreni bili i Vladimir Mihailović sa 14 i Emir Hadžibegović sa 11 poena.

Kod gostiju, 15 poena ubacio je Bara Endžije, 13 Melvin Pancar.

Crna Gora će kvalifikacije za Eurobasket nastaviti u novembru, kada će odigrati dvije utakmice protiv Bugarske, koja je danas iznenadila Njemačku, pa sve četiri ekipe nakon dva kola u grupi imaju polovičan učinak.

Tok utakmice:

POSLJEDNJA ČETVRTINA:

37. minut – Dobra posljednja četvrtina Marka Simonović, poslije skoka u napadu poentirao je iz reketa za 87:67.

35. minut – Nemanja Radović prekida post u napadu našeg tima za 81:62.

33. minut – Ne igra se lijepo u uvodu posljednjeg perioda, ali Crna Gora ima sigurnih 77:60.

TREĆA ČETVRTINA:

Uoči posljednje četvrtine, Crna Gora vodi 75:57. Kendrik Peri vukao je tim u ovom periodu i naša selekcija ima odličan rezultat pred završnih 10 minuta.

29. minut – Opet smo proradili u napadu, važna trojka Marka Simonovića, pa nakon koša Bare Endžijea, uzvratio je Nemanja Radović iz reketa. 69:54.

27. minut – Nekoliko brzopletih odluka u napadu naših kaznila je Švedska, poentirao je Endžije za 64:52, pa je tajm aut pozvao naš selektor Boško Radović.

26. minut – Švedska je u seriji 7:0, pa smanjuje na 64:50.

24. minut – Lijepa solo akcija Emira Hadžibegovića i poeni iz reketa. 61:41, tajm aut Švedska.

22. minut – Kendrik Peri odlično otvara nastavak. Najprije poeni iz prodora, pa zakucavanje nakon ukradene lopte i onda trojka za 57:37.

DRUGA ČETVRTINA:

U našem timu devet poena Mihailovića, osam Nikolića, po šest Perija i Hadžibegovića. Sa druge strane, 10 poena Ramsteta.

Na poluvremenu 50:37 za naš tim, koji je u drugom periodu napravio razliku.

18. minut – Vlado Mihailović pogađa bacanja, a nakon dobre odbrane ubacuje i trojku za maksimalnih 45:33.

17. minut – Sjajna asistencija Kendrika Perija za zakucavanje Marka Simonovića, 40:32.

14. minut – Poslije trojke Adama Ramšteta kojom su gosti smanjili na 34:29, tajm aut je pozvao Boško Radović.

12. minut –  Nakon što je Švedska iskoristila prvi napad u drugoj četvrtini da smanje na 32:26, naši su ubacili pet poena (dva Popović, pa tri Drobnjak) i vodimo 32:26.

PRVA ČETVRTINA:

Nakon 10 minuta košarke u “Morači”, 27:24 za naš tim. Osam poena postigao je Zoran Nikolić, po šest Kendrik Peri i Emir Hadžibegović. Gosti su ubacili pet trojki, a najviše poena ima Bara Endžije, ukupno pet.

9. minut – Serija Crne Gore od 7:0, koja može da bude povećana, ako Vlado Mihailović iskoristi dodatno slobodno bacanje. Prije toga, tajm aut za Švedsku, vodimo 24:19.

7. minut – Razigrao se Zoran Nikolić sa osam poena za kratko vrijeme i prvi put smo poveli, 17:16.

5. minut – Nakon trojke Nikolasa Piresa, Švedska je povela 14:8, ali je Emir Hadžibegović drugom trojkom smanjio na minus tri.

3. minut – Otvorili smo trojkom Hadžibegovića, ali i u gosti odlično šutiraju i već su dva puta ubacili šuteve za tri. Nakon asistencije Nikolića i poena Radončića iz reketa, Švedska vodi 8:6.

Naša selekcija utakmicu počinje u petorci Kendrik Peri, Vladimir Mihailović, Dino Radončić, Emir Hadžibegović i Marko Simonović.

Najava meča:

Nakon slabe partije i poraza u Njemačkoj prije tri večeri, uoči ove utakmice pobjeda se nameće kao imperativ za naše momke.

“Iako je tek drugo kolo, slobodno mogu reći da je to utakmica koja poprilično može da odredi dalji tok ovih kvalifikacija. Baš zbog toga, pod imperativom pobjede smo protiv Švedske, koja je dobra reprezentacija, iako je oslabljena bez dva igrača koja su veoma značajna za njih “, rekao je selektor Boško Radović.

Crna Gora sa ulogom favorita dočekuje duel sa skandinavskom selekcijom, koja je na premijeri ciklusa za prvenstvo Evrope savladala kod kuće Bugarsku, koja je danas iznenadila Njemačku i upisala pobjedu.

Ipak, u Podgorici bi sve osim pobjede našeg tima bilo iznenađenje.